மதுரை ரயில் நிலையத்தில் அனுமதியின்றி வீடியோ எடுத்து சமூக வலைதளங்களில் வெளியிட்ட ஒரு இளம் ஜோடியைத் தேடி ரயில்வே பாதுகாப்பு படை போலீசார் தீவிர விசாரணை மேற்கொண்டு வருகின்றனர்.
சமீபத்தில் சமூக வலைதளங்களில் வெளியான ஒரு வீடியோவில், மதுரை ரயில் நிலையப் பிளாட்பாரத்தில் ஒரு இளைஞரும் பெண்ணும் திரைப்படக் காட்சியைப் போல வீடியோ எடுத்துள்ளனர். குறிப்பாக, அஜித் மற்றும் தேவயானி நடிப்பில் வெளியான ‘காதல் கோட்டை’ திரைப்படத்தின் இறுதிப் பகுதியில் வரும் காட்சியைப் பிரதிபலிக்கும் வகையில், அந்தப் படத்தின் பாடல் வரிகளுக்கு ஏற்ப இந்த வீடியோ உருவாக்கப்பட்டுள்ளது.
தொழில்நுட்ப ஆய்வும் போலீசாரின் தேடலும்
இந்த வீடியோ சமூக வலைதளங்களில் பரவியதை அறிந்த ரயில்வே பாதுகாப்பு படை போலீசார், இது செயற்கை நுண்ணறிவு (AI) மூலம் உருவாக்கப்பட்ட வீடியோவா அல்லது உண்மையான இடத்தில் எடுக்கப்பட்டதா என்று முதற்கட்டமாக ஆய்வு செய்தனர். அதன் பிறகு, மதுரை ரயில் நிலையப் பிளாட்பாரத்தில் நிறுத்தப்பட்டிருந்த ரயிலில் வைத்து இந்த வீடியோ எடுக்கப்பட்டது என்பது உறுதி செய்யப்பட்டது.
தற்போது, அந்த வீடியோவை வெளியிட்ட சமூக வலைதளக் கணக்குகளின் விவரங்களை அடிப்படையாகக் கொண்டு, சம்பந்தப்பட்ட நபர்களைக் கண்டறியும் பணியில் போலீசார் ஈடுபட்டுள்ளனர்.
ரயில்வே விதிகளின் மீறல்
ரயில் நிலையங்களுக்குள் அதிகாரப்பூர்வ அனுமதி இன்றி புகைப்படங்கள் எடுப்பதும், வீடியோ பதிவு செய்வதும் முற்றியிலும் தடை செய்யப்பட்டுள்ளது. குறிப்பாக, ரயில் வரும்போது தண்டவாளத்தில் நிற்பதோ அல்லது ரயிலின் மீது ஏறி வீடியோ எடுப்பதோ உயிருக்கே ஆபத்தான செயல் என்பதால், இத்தகைய செயல்களில் ஈடுபடுபவர்களுக்குச் சிறை தண்டனை வழங்க ரயில்வே விதிகளில் தெளிவான வழிகாட்டுதல்கள் உள்ளன என்று போலீசார் தெரிவித்துள்ளனர்.
பொதுமக்களின் பாதுகாப்பு கருதி, ரயில் நிலைய வளாகத்திற்குள் இத்தகைய தேவையற்ற செயல்களில் ஈடுபட வேண்டாம் என்று ரயில்வே பாதுகாப்பு படை சார்பில் எச்சரிக்கை விடுக்கப்பட்டுள்ளது.
Leave a Reply