இந்தியாவின் முன்னணி விமான போக்குவரத்து நிறுவனமான இண்டிகோ, தனது பயணிகளின் வசதிக்காக விமான நிலையங்களுக்குச் சென்று வருவதற்கான புதிய கார் சேவை திட்டத்தைத் தொடங்கியுள்ளது. பயணிகளுக்கு விமான நிலையப் போக்குவரத்துத் திட்டங்களை எளிதாக்கும் நோக்கில் ‘கேப்ஸ் வித் இண்டிகோ’ என்ற பெயரில் இந்தச் சேவை அறிமுகப்படுத்தப்பட்டுள்ளது.
பயணிகளின் சிரமங்களுக்குத் தீர்வு
பொதுவாக விமான நிலையங்களுக்குச் செல்லும் போது பயணிகள் சந்திக்கும் போக்குவரத்துத் தடைகள் மற்றும் கடைசி நேரப் பயண ரத்துகளால் ஏற்படும் சிரமங்களைத் தவிர்ப்பதே இத்திட்டத்தின் முக்கிய நோக்கமாகும். இந்தச் சேவையின் மூலம் பயணிகள் சரியான நேரத்திற்கு விமான நிலையத்தை அடைய முடியும் என்பது உறுதி செய்யப்பட்டுள்ளது.
மோஜோபாக்ஸ் நிறுவனத்துடன் கூட்டணி
இந்த போக்குவரத்துச் சேவையை மேம்படுத்த மோஜோபாக்ஸ் என்ற போக்குவரத்துத் தளத்துடன் இண்டிகோ நிறுவனம் இணைந்துள்ளது. இதன் மூலம் இந்தியாவின் முக்கிய நகரங்களில் உள்ள பயணிகள், நம்பகமான மற்றும் தொந்தரவற்ற பயண வசதியைப் பெற முடியும். விமான நிலையப் பயணங்களை வெறும் 49 ரூபாய் என்ற ஆரம்ப விலையில் இண்டிகோ இணையதளத்தின் மூலம் முன்பதிவு செய்து கொள்ளலாம் என்று தெரிவிக்கப்பட்டுள்ளது.
கூடுதல் சலுகைகள் மற்றும் வசதிகள்
விமானப் பயணங்களில் ஏற்படும் தாமதங்கள் மற்றும் நிச்சயமற்ற தன்மைகளைக் கருத்தில் கொண்டு, இந்தச் சேவையில் ஓட்டுநர்கள் 30 நிமிடங்கள் வரை இலவசமாகக் காத்திருக்கும் வசதியை வழங்குகின்றனர். மேலும், முன்பதிவு செய்த பயணங்களை ரத்து செய்ய விரும்பினால், அதற்கான கட்டணங்கள் எதுவும் வசூலிக்கப்படாது என்பது குறிப்பிடத்தக்கது.
முன்பதிவு செய்யும் முறை
பயணிகள் இண்டிகோ நிறுவனத்தின் அதிகாரப்பூர்வ இணையதளம் அல்லது அவர்களின் மொபைல் செயலி வாயிலாக இந்த கார் சேவையை எளிதாக முன்பதிவு செய்து கொள்ளலாம். பயணங்கள் தொடங்குவதற்கு முன்பும், விமான நிலையத்தைச் சென்றடைந்த பின்னரும் நம்பகமான போக்குவரத்தை வழங்குவதன் மூலம் பயணிகளின் பயண அனுபவத்தை மேம்படுத்த இந்த நடவடிக்கை எடுக்கப்பட்டுள்ளதாக இண்டிகோ நிறுவனம் தனது அறிவிப்பில் தெரிவித்துள்ளது.
Leave a Reply