உணவு முறைகளில் முட்டை சைவ உணவா அல்லது அசைவ உணவா என்ற கேள்வி பல ஆண்டுகளாக ஒரு விவாதப் பொருளாகவே இருந்து வருகிறது. பலரும் முட்டையை அசைவ உணவாகக் கருதுகின்றனர், அதே நேரத்தில் சில சைவ உணவு முறையை பின்பற்றுபவர்கள் முட்டையைத் தங்கள் உணவில் சேர்த்துக் கொள்வதை வழக்கமாகக் கொண்டுள்ளனர். இதன் பின்னணியில் உள்ள அறிவியல் உண்மைகளை விரிவாகக் காண்போம்.
கருவுறுதல் மற்றும் முட்டையின் தன்மை
அறிவியல் ரீதியாகப் பார்க்கும் போது, வணிக ரீதியான கோழிப் பண்ணைகளில் இருந்து கிடைக்கும் பெரும்பாலான முட்டைகள் கருவுறாதவையாகவே இருக்கின்றன. அதாவது, இத்தகைய முட்டைகளிலிருந்து குஞ்சுகள் பொரிப்பதற்கான வாய்ப்பு இல்லை. பொதுவாக, ஒரு கோழி சேவலோடு இணைந்து இடும் முட்டையிலிருந்து மட்டுமே கரு உருவாகி குஞ்சு பொரிக்கும்.
சேவலின் துணை இல்லாமல் கோழி இடும் முட்டைகளில் உயிரணுக்கள் வளர்ச்சி அடைவதில்லை. எனவே, ஒரு உயிரை நாம் உணவாக்கிக் கொள்வதையே அசைவம் என்று வரையறுத்தால், உயிரே இல்லாத இத்தகைய முட்டைகளை சைவ உணவாகக் கருத முடியும்.
கோழிகளின் உடலியல் செயல்பாடு
நாட்டுக்கோழிகள் மற்றும் வீட்டுக்கோழிகள் அனைத்தும் சேவல் இல்லாமலேயே முட்டையிடும் இயல்பைக் கொண்டவை. இவை தங்கள் முதிர்ச்சி நிலையை அடைந்தவுடன் மரபியல் ரீதியாகத் தானாகவே முட்டையிடத் தொடங்கும். பிராய்லர் கோழிப் பண்ணைகளில், முட்டை உற்பத்திக்காக சேவல்கள் வளர்க்கப்படுவதில்லை. முறையான தீவனம் மற்றும் ஒளி வசதிகள் அளிக்கப்படுவதால், கோழிகள் தினசரி முட்டைகளை இடுகின்றன. இவற்றில் கரு உருவாவதற்கான வாய்ப்பு இல்லை என்பதால் இவை சைவ முட்டைகளாகக் கருதப்படுகின்றன.
இருப்பினும், சில பண்ணைகளில் குஞ்சு பொரிப்பதற்காகச் சேவல்களைச் சேர்த்து வளர்ப்பார்கள். இத்தகைய சூழலில் உருவாகும் முட்டைகளில் கரு இருக்கலாம். அறிவியல் ரீதியாக அவை அசைவ முட்டைகளாகவே வகைப்படுத்தப்படுகின்றன.
பால் மற்றும் தேனுடன் ஒப்பீடு
முட்டை கோழியின் உடலிலிருந்து வருவதால் அது அசைவம் என்று வாதிடுபவர்கள், பால் மற்றும் தேன் ஆகியவற்றின் தன்மையையும் கவனிக்க வேண்டும். பால் பசுக்களிடமிருந்தும், தேன் தேனீக்களிடமிருந்தும் பெறப்படுகின்றன. இவை விலங்குகளின் உடலிலிருந்து பெறப்பட்டும், பாரம்பரியமாக சைவ உணவுகளாகவே கருதப்படுகின்றன. ஏனெனில், பால் அல்லது தேன் எடுக்கும் போது எந்த உயிரும் கொல்லப்படுவதில்லை. அதே தர்க்கத்தின் அடிப்படையில், குஞ்சு இல்லாத முட்டைகளும் சைவ உணவாகவே அமையும்.
ஊட்டச்சத்து மற்றும் தரம்
சேவல் இணைந்த முட்டைகளுக்கும், இணைக்காத முட்டைகளுக்கும் ஊட்டச்சத்து அளவில் எந்த மாற்றமும் இருப்பதில்லை. முட்டையின் புரதம், கொழுப்பு, வைட்டமின்கள் மற்றும் தாதுக்கள் கோழி உட்கொள்ளும் தீவனம் மற்றும் அதன் ஆரோக்கியத்தைப் பொறுத்தே அமைகின்றன. சேவலின் விந்தணு முட்டையின் ஒரு சிறு புள்ளியில் மட்டுமே இணைவதால், அது முட்டையின் ஒட்டுமொத்த ஊட்டச்சத்தை எந்த வகையிலும் பாதிப்பதில்லை.
Leave a Reply