சென்னையில் மதுபானக் கூடத்தில் ஏற்பட்ட மோதலின் தொடர்ச்சியாக, கோயம்பேடு மேம்பாலத்தின் அருகே 18 வயது இளம்பெண் ஒருவர் கார் மோதி உயிரிழந்த சம்பவம் பெரும் கவலையை ஏற்படுத்தியுள்ளது. இந்த கொடூரமான கொலைச் சம்பவம் குறித்து அம்மா மக்கள் முன்னேற்ற கழக பொதுச்செயலாளர் டி.டி.வி.தினகரன் தனது சமூக வலைதளப் பக்கத்தில் கடுமையான விமர்சனங்களை முன்வைத்துள்ளார்.
சிங்கப்பெண் திட்டத்தின் அமலாக்கம்
தமிழகத்தில் பெண்களின் பாதுகாப்பை உறுதி செய்ய அரசு முன்னெடுத்த திட்டங்களில் ஒன்றான ‘சிங்கப்பெண் சிறப்பு அதிரடிப் படை’ குறித்து டிடிவி தினகரன் தனது பதிவில் குறிப்பிட்டுள்ளார். முதலமைச்சர் ஜோசப் விஜய் அவர்கள் பொறுப்பேற்ற நாளில் இந்தத் திட்டத்திற்கு கையெழுத்திடப்பட்டது. இருப்பினும், இதுவரை இத்திட்டத்தை முழுமையாகத் தொடங்கி வைக்கவில்லை என்று குற்றம் சாட்டிய அவர், இத்தகைய திட்டங்களைச் செயல்படுத்தாமல் பெண்களுக்கு எதிரான குற்றங்களைக் கட்டுப்படுத்துவது எப்படி என்பது குறித்து பொதுமக்களிடையே கேள்வி எழுந்துள்ளதாகத் தெரிவித்துள்ளார்.
போதைப்பொருள் புழக்கம் மற்றும் தீர்வும்
தமிழக இளைஞர்களிடையே ஊடுருவியுள்ள போதைப்பொருள் விற்பனை குறித்த அமைச்சர்கள் மற்றும் அரசின் அணுகுமுறையை அவர் விமர்சித்துள்ளார். இளைஞர்களின் கவனத்தை விளையாட்டுகளின் பக்கம் திருப்ப வேண்டும் என்ற அமைச்சர் ஆதவ் அர்ஜுனாவின் கருத்து ஓரளவிற்குச் சரியாக இருந்தாலும், அது முழுமை பெற வேண்டுமானால் தமிழகத்தின் அனைத்து பகுதிகளிலும் சட்டவிரோதமாக விற்பனை செய்யப்படும் கஞ்சா உள்ளிட்ட போதைப்பொருட்களை முழுமையாகத் தடை செய்ய வேண்டும் என்று வலியுறுத்தினார்.
அரசுக்கு விடுத்த கோரிக்கை
தற்போது நிகழ்ந்த இளம்பெண் கொலை வழக்கை அடிப்படையாகக் கொண்டு, தமிழக அரசு உடனடி நடவடிக்கை எடுக்க வேண்டும் என்று அவர் கோரிக்கை விடுத்துள்ளார். குறிப்பாக, முறையான அனுமதி இன்றி இயங்கும் மதுபானக் கூடங்களை உடனடியாக மூடுவதோடு, அங்கு சட்டவிரோதமாக போதைப்பொருட்களை விற்பனை செய்யும் கும்பல்களைக் கண்டறிந்து அவர்கள் மீது கடுமையான சட்ட நடவடிக்கை எடுக்க வேண்டும் என்று தவெக அரசை அவர் வலியுறுத்தியுள்ளார்.
Leave a Reply