இந்தியப் பிரதமர் நரேந்திர மோடி பொறுப்பேற்று இன்றுடன் 12 ஆண்டுகள் நிறைவடைந்துள்ளன. இதன் மூலம் இந்தியாவின் அரசியல் வரலாற்றில் நீண்ட காலம் பிரதமர் பதவியில் இருந்தவர்கள் பட்டியலில் அவர் இரண்டாம் இடத்தைப் பிடித்துள்ளார்.
இந்தியாவின் முதல் பிரதமர் ஜவஹர்லால் நேரு 16 ஆண்டுகளும் 286 நாட்களும் இடைவெளியின்றி பிரதமராகப் பணியாற்றி முதலிடத்தில் நீடிக்கிறார். அதற்கு அடுத்த இடத்தில் தற்போது நரேந்திர மோடி உள்ளார். முன்னதாக, 1966 முதல் 1977 வரை தொடர்ச்சியாக 4,077 நாட்கள் பிரதமராக இருந்த இந்திரா காந்தியின் சாதனையை கடந்த 2025 ஆம் ஆண்டிலேயே பிரதமர் மோடி முறியடித்தது குறிப்பிடத்தக்கது.
தேர்தல் வெற்றிகளின் தொடர்ச்சி
குஜராத் மாநில முதலமைச்சராக 2002, 2007 மற்றும் 2012 ஆம் ஆண்டு தேர்தல்களில் வெற்றி பெற்று அரசியல் வலுப்பெற்ற மோடி, பின்னர் தேசிய அரசியலில் நுழைந்தார். 2014, 2019 மற்றும் 2024 ஆகிய ஆண்டுகளில் நடைபெற்ற மக்களவைத் தேர்தல்களில் பெரும்பான்மை ஆதரவுடன் வெற்றி பெற்று, தொடர்ந்து மூன்றாவது முறையாகப் பிரதமராகப் பொறுப்பை வகித்து வருகிறார்.
மந்திரி ராஜ்நாத் சிங்கின் வாழ்த்துகள்
பிரதமரின் 12 ஆண்டுகாலப் பயணத்தை முன்னிட்டு பாதுகாப்புத்துறை அமைச்சர் ராஜ்நாத் சிங் தனது வாழ்த்துகளைத் தெரிவித்துள்ளார். இது குறித்து அவர் வெளியிட்டுள்ள பதிவில், “மே 26, 2014 அன்று இந்தியாவின் வளர்ச்சிப் பயணத்தில் ஒரு புதிய அத்தியாயம் தொடங்கியது. மோடி அவர்கள் பிரதமராகப் பதவியேற்ற அந்த நாள், நாட்டின் நிர்வாகம் மற்றும் தேசிய உறுதிப்பாட்டில் ஒரு தீர்க்கமான மாற்றத்தை ஏற்படுத்தியது” என்று குறிப்பிட்டுள்ளார்.
மேலும், பொருளாதார வளர்ச்சி, தற்சார்பு இந்தியா, டிஜிட்டல் மாற்றம் மற்றும் உள்கட்டமைப்பு விரிவாக்கம் ஆகியவற்றில் பிரதமர் மோடியின் தலைமையிலான அரசு முன்னெப்போதும் இல்லாத வேகத்தில் முன்னேறியுள்ளதாக ராஜ்நாத் சிங் புகழாரம் சூட்டியுள்ளார். சமூகத்தின் விளிம்பு நிலையில் இருந்த லட்சக்கணக்கான மக்கள் இன்று நாட்டின் வளர்ச்சிப் பயணத்தில் தீவிரப் பங்களிப்பாளர்களாக மாறியுள்ளதாகவும் அவர் தெரிவித்துள்ளார்.
தன்னலமற்ற அர்ப்பணிப்புடன் நாட்டுக்குச் சேவை செய்யும் பிரதமர் மோடிக்குத் தொடர்ந்து உடல்நலமும், நீண்ட ஆயுளும் கிடைக்க இறைவனைப் பிரார்த்திப்பதாக ராஜ்நாத் சிங் தனது பதிவில் நிறைவு செய்துள்ளார்.
Leave a Reply