ஈரானுடனான அமைதி ஒப்பந்தம் குறித்த பேச்சுவார்த்தைகள் இறுதி கட்டத்தை எட்டியுள்ள நிலையில், ஹார்முஸ் ஜலசந்தியில் ஈரானால் அமைக்கப்பட்ட கடல் கண்ணி வெடிகளை அகற்றுவதற்கான பூர்வாங்க பணிகளில் ஈடுபட பிரிட்டன் கடற்படை தயாராகி வருகிறது.
தடை செய்யப்பட்ட கடல் வழித்தடம்
மேற்காசிய நாடான ஈரான் மீது அமெரிக்காவும் இஸ்ரேலும் இணைந்து போர் தொடுத்ததன் விளைவாக, சர்வதேச கப்பல் போக்குவரத்திற்கு மிக முக்கியமான ஹார்முஸ் ஜலசந்தியை ஈரான் முடக்கியது. அமெரிக்க கடற்படையின் முற்றுகையைத் தடுக்கும் நோக்கில், இப்பகுதியில் ஈரான் கடல் கண்ணி வெடிகளைப் புதைத்துள்ளதாகக் கூறப்படுகிறது. இதனால் எரிபொருள் மற்றும் சரக்குக் கப்பல்களின் இயக்கம் பெரும் பாதிப்புக்குள்ளானது.
சர்வதேச கூட்டுப்படையின் திட்டம்
தற்போது போரை முடிவுக்குக் கொண்டுவருவதற்கான பேச்சுவார்த்தைகள் தீவிரமாக நடைபெற்று வருகின்றன. போர் நிறுத்த ஒப்பந்தம் அதிகாரப்பூர்வமாக கையெழுத்தானவுடன், ஹார்முஸ் ஜலசந்தியை மீண்டும் பாதுகாப்பான கப்பல் போக்குவரத்திற்குத் திறந்து விடுவதற்கான பணிகள் தொடங்கும். இதற்காக பிரிட்டன் மற்றும் பிரான்ஸ் தலைமையில் 40-க்கும் மேற்பட்ட நாடுகள் இணைந்த சர்வதேச கூட்டுப்படை, கண்ணி வெடிகளை அகற்றும் பணியில் ஈடுபட உள்ளது.
அதிநவீன தொழில்நுட்பக் கப்பல்கள்
இந்த நடவடிக்கையை முன்னெடுக்கும் வகையில், ஐரோப்பிய நாடான பிரிட்டனின் ஜிப்ரால்டர் கடற்கரையில் நிறுத்தப்பட்டுள்ள ஆர்.எப்.ஏ. லைம் பே (RFA Lyme Bay) என்ற கப்பலில் நூற்றுக்கணக்கான பிரிட்டிஷ் கடற்படை வீரர்கள் தயார் நிலையில் உள்ளனர். இக்கப்பலில் வெடிபொருட்கள் மற்றும் சோனார் தொழில்நுட்பம் கொண்ட அதிநவீன நீர்மூழ்கி ட்ரோன்கள் ஏற்றப்பட்டு வருகின்றன.
இந்தக் கப்பல் விரைவில் எகிப்தின் சூயஸ் கால்வாய் வழியாக பாரசீக வளைகுடாவை நோக்கிப் புறப்படத் திட்டமிடப்பட்டுள்ளது. சர்வதேச கடல் வழிப்பயணத்தின் பாதுகாப்பை உறுதி செய்வதே இந்த நடவடிக்கையின் முதன்மை நோக்கமாக உள்ளது.
Leave a Reply