தமிழ்நாட்டில் ஜோசப் விஜய் தலைமையிலான தமிழக வெற்றிக் கழக அரசு இயங்கி வரும் நிலையில், அக்கட்சியின் நிர்வாகிகள் அரசு அலுவலகங்கள் மற்றும் மருத்துவமனைகளில் ஆய்வு என்ற பெயரில் அத்துமீறுவதாகக் குற்றச்சாட்டுகள் எழுந்துள்ளன. இது குறித்து அமமைக் கட்சியின் பொதுச்செயலாளர் டிடிவி தினகரன் தனது கடும் கண்டனத்தைப் பதிவு செய்துள்ளார்.
தவெக நிர்வாகிகளின் அதிகார துஷ்பிரயோகத்தை முளையிலேயே கிள்ளி எறியும் வகையில், சம்பந்தப்பட்டவர்கள் மீது அரசு உரிய நடவடிக்கை எடுக்க வேண்டும் என்று டிடிவி தினகரன் வலியுறுத்தியுள்ளார். இது தொடர்பாக அவர் வெளியிட்டுள்ள அறிக்கையில் விரிவான புகார்களை முன்வைத்துள்ளார்.
தென்காசி மாவட்ட நிகழ்வுகள்
தென்காசி மாவட்டத்தில் ‘தவெக மருத்துவரணி’ என்ற பெயரில் சிலர் அரசு மருத்துவமனைக்குள் நுழைந்து ஆய்வு நடத்தியதாகவும், அதேபோல் மாவட்டச் செயலாளர் என்ற பொறுப்பில் உள்ள சிலர் அம்மா உணவகங்களில் ஆய்வு மேற்கொண்டதாகவும் ஊடகங்களில் செய்திகள் வெளியாகி இருப்பதை அவர் சுட்டிக்காட்டினார்.
ஆளுங்கட்சி என்ற அதிகாரத் தோரணையில், தவெக நிர்வாகிகள் அரசு அலுவலகங்களில் திடீர் ஆய்வுகளை மேற்கொள்வதும், அரசு அதிகாரிகளுக்கு உத்தரவு இடுவதும் கடும் கண்டனத்திற்குரியது என்று அவர் குறிப்பிட்டுள்ளார். அரசு அலுவலகங்களில் முறையான ஆய்வுகளை மேற்கொள்வதற்கும், தவறுகளைச் சரிசெய்து நடவடிக்கை எடுப்பதற்கும் முறையான நிர்வாகக் கட்டமைப்பு இருக்கும்போது, ஆளும் கட்சியின் உறுப்பினர்களுக்கு இத்தகைய அதிகாரத்தை வழங்கியது யார் என்று அவர் கேள்வி எழுப்பியுள்ளார்.
முதலமைச்சரின் செயல்பாடுகள் குறித்த விமர்சனம்
முதலமைச்சர் ஜோசப் விஜய் தனது பதவி ஏற்பு விழாவின் போது, “யார் தவறு செய்தாலும், அவர்கள் என்னோடு இருப்பவர்களாக இருந்தாலும் அவர்களை விட்டுவிட மாட்டேன்” என்று சூளுரைத்ததை நினைவுபடுத்திய டிடிவி தினகரன், தனது கட்சிக்காரர்கள் அதிகார துஷ்பிரயோகத்தில் ஈடுபட்டும் இதுவரை நடவடிக்கை எடுக்காதது ஏன் என்று கேள்வி எழுப்பியுள்ளார்.
மேலும், முதலமைச்சர் பொறுப்பேற்றதிலிருந்து அவரது அலுவலகம் உள்ளிட்ட அரசு இடங்கள் மற்றும் பொது இடங்களில் படப்பிடிப்புத் தளங்களைப் போல செயல்பாடுகள் நடந்து வருவதாகப் பொதுமக்கள் குற்றம் சாட்டுவதாகக் கூறியுள்ளார். ஆளும் கட்சியினர் மற்றும் ரசிகர்கள் என்ற போர்வையில், முதலமைச்சரின் அறைக்குள் நடக்கும் விவாதங்களை வீடியோ எடுத்து, சமூக வலைதளங்களில் விளம்பரத்திற்காகப் பதிவிடுவது தவெக அரசின் சாதனையாக மாறிவிட்டதாக அவர் விமர்சித்துள்ளார்.
விளம்பரத்திற்கும் மக்கள் பணிக்கும் உள்ள வேறுபாடு
விளம்பரம் என்பது வேறு, மக்கள் பணி என்பது வேறு என்பதை முதலமைச்சர் ஜோசப் விஜய் தனது கட்சித் தொண்டர்களுக்குத் தெளிவுபடுத்த வேண்டும் என்று டிடிவி தினகரன் கேட்டுக்கொண்டுள்ளார். அரசு அலுவலகங்களிலும், பொது இடங்களிலும் தவெகவினரின் அதிகார ஆதிக்கத்தைத் தடுத்து, அவர்கள் மீது உரிய சட்டப்பூர்வ நடவடிக்கைகள் எடுக்கப்பட வேண்டும் என்றும் அவர் தனது அறிக்கையில் வலியுறுத்தியுள்ளார்.
Leave a Reply