கோவை அவினாசி ரோட்டில் உப்பிலிபாளையம் முதல் கோல்டுவின்ஸ் வரை 10.1 கிலோ மீட்டர் தூரத்திற்கு ரூ.1,750 கோடி செலவில் புதிய மேம்பாலம் கட்டப்பட்டுள்ளது. கோவை மாநகரின் போக்குவரத்து நெரிசலை குறைக்கும் வகையில் கட்டப்பட்ட இந்த மேம்பாலத்திற்கு முதலமைச்சர் மு.க.ஸ்டாலின் ஜி.டி.நாயுடுவின் பெயரை சூட்டினார்.
கண்காணிப்பு கேமராக்கள் பொருத்தும் பணி
இந்த மேம்பாலத்தில் அதிவேகமாக செல்லும் வாகனங்களை கண்காணிப்பதற்காக இரவு நேரத்திலும் வாகனங்களின் பதிவு எண்கள் மற்றும் வேகத்தை கண்டறியும் வகையில் நவீன கேமராக்கள் பொருத்த முடிவு செய்யப்பட்டது. இதையடுத்து, இந்த கேமராக்கள் பொருத்தும் பணி இன்று (சனிக்கிழமை) மற்றும் நாளை (ஞாயிற்றுக்கிழமை) ஆகிய இரண்டு நாட்களும் நடைபெறுகிறது. எனவே, மேற்கண்ட இரண்டு நாட்களும் இரவு நேரத்தில் இந்த மேம்பாலத்தில் வாகன போக்குவரத்திற்கு தடை விதிக்கப்பட்டுள்ளது.
போலீஸ் அறிவிப்பு
இதுகுறித்து கோவை மாநகர போலீசார் வெளியிட்டுள்ள செய்திக்குறிப்பில், “கோவை ஜி.டி.நாயுடு மேம்பாலத்தில் கண்காணிப்பு கேமராக்கள் பொருத்தும் பணி நடக்கிறது. எனவே 2 நாட்கள் இரவு 10 மணி முதல் காலை 6 மணி வரை வாகன போக்குவரத்திற்கு முற்றிலும் தடை விதிக்கப்படுகிறது. பகல் நேரத்தில் வாகனங்கள் வழக்கம் போல் செல்லலாம்” என்று தெரிவிக்கப்பட்டுள்ளது.
மாற்று வழிகள்
இந்த மேம்பாலம் மூடப்பட்டிருக்கும் நேரங்களில், வாகன ஓட்டிகள் அவினாசி ரோட்டில் உள்ள கீழ் சாலை வழியாகவும், சுற்று வட்டார சாலைகள் வழியாகவும் செல்லுமாறு கேட்டுக் கொள்ளப்படுகிறார்கள். போலீசார் போதுமான ஏற்பாடுகளை செய்துள்ளதாக தெரிவித்துள்ளனர்.
Leave a Reply